A MTati Bello, pola súa curiosidade
Coles de Bruselas Salteadas «Hemero DIY»
«A comida máis rica é a feita na casa», aínda que esta afirmación non ten por que cumprirse sempre, o certo é que se poñemos bos ingredientes e amor naquilo que cociñemos, o prato pode saír suculento. Así que para todas aquelas persoas que teñen algún tipo de curiosidade histórica ou cultural e que ás veces me preguntan onde logro atopar a documentación, compilei esta "Hemero DIY" de recursos electrónicos para facilitarlles o traballo. O modo de emprego básico é escribir entre comiñas o que se quere buscar: "nagy lajos", "jose villaverde", "constantino candeira" ou o que sexa dentro do buscador de cada unha das páxinas (como mostra máis abaixo a imaxe) e de aí a surfear. A preparación é intuitiva, así que segundo interese é posible limitar a pescuda por anos, materias, títulos... O asunto é empezar.
Particularmente, ofrezo aquí un salteado dalgúns dos recursos que eu manexo e que podedes ampliar tanto coa bibliografía de Epifanías Libertarias non é un TFG, vai máis alá! coma co apartado "Extra". Se ben todos estes portais son útiles e sorprendentes (Gallica é impresionante), no meu caso, os que máis emprego son o da hemeroteca dixital da Biblioteca Nacional de España, Galiciana e mais o portal da Biblioteca Virtual de Prensa Histórica. A selección, agás o primeiro apartado "España Institucional", segue unha orde alfabética de lugar, primeiro para a Península Ibérica e Canarias e despois os recursos de ámbito internacional. Non vos estrañedes se atopades algunha que outra Sor Presa nalgún enlace: hai moito material que existe pero non que está dixitalizado.... Finalmente: paciencia, ese é o requisito básico: lume, pero manso!! BON APPÉTIT!!
